COUME AME CABANO...Poème de Léopold Vidau

COUME AME CABANO

Pèr li niue d'estiéu, dins l'erbo embaumado,

Lis iue vers l'azur, d'astre esbrihaudant,

Pantaie de tu, ciéuta bèn amado,

E mi raive soun d'amour desbourdant.

O Cabano! t'ame, o gènto viloto!

Toun noum soul m'encanto, o moun bèu païs!

En tu tout me plais, galanto mignoto. T'ame: pèr iéu siés un pur paradis.

Oh! ve, t'ame coume un enfant sa maire,

Coume amo un aucèu soun nis tant galant,

Coume uno amourouso amo soun amaire,

Coume un parpaioun amo l'ièli blanc. …

Ame, pièi, d'ausi vounvouna dins l'aire

De toun fort mistrau l'alen plen d'amplour,

Empourtant di riéu lou cascai parlaire

Emé mi cansoun de joio e d'amour.

Quand lou grand soulèu cremo la Prouvènço

E met sus toun front sa courouno d'or,

Dins toun brès flouri, bello de jouvènço,

Cabano, o moun nis! siés mai qu'un tresor!

E quouro l'ivèr, de nèu, de plouvino, —

Diamantino armino, — adus un mantèu,

Mau-grat rounfle e gèu siés sèmpre divino.

Brès, fougau, toumbèu, — moun païs es bèu!...

Siéu pacan? Qu'enchau! catau ni mounarco

Noun sauprien segur t'ama coume iéu.

Se Lauro encitè li vers de Petrarco,

Enaurant ma liro en tu moun cor viéu.

LEOPOLD VIDAU